فئة الـFlagship Killer في مصر بقت مزدحمة أوي في الفترة الأخيرة، وكل شركة بتحاول تقدم حاجة مختلفة عن التانية. ودلوقتي جه دور Vivo X300 FE، الهاتف اللي بيراهن على ورقة مختلفة تمامًا عن منافسيه: الشاشة الصغيرة المدمجة، في وقت كل الفئة دي بقت بتتجه للشاشات الكبيرة. في المراجعة دي هنقولك تجربتنا الكاملة مع الهاتف: التصميم، الأداء، البطارية، الكاميرات، وطبعًا السعر الرسمي في مصر، عشان تقرر بنفسك هو يستاهل فلوسك ولا لأ.
التصميم: خامات محترمة وتنفيذ أنيق
الكاميرا الخلفية في Vivo X300 FE موجودة جوه إطار بالعرض، وتصميمها قريب شوية من شكل iPhone Air، لكن فيفو نفذته بشكل جيد جدًا. فيه عدستين كبار وعدسة صغيرة، مع شعار ZEISS المعروف. الكاميرا بارزة شوية عن جسم الموبايل، لكن بشكل طبيعي وغير مبالغ فيه خالص، وفيه إطار لامع حوالين الكاميرا متناسق تمامًا مع إطار الموبايل.
الخامات محترمة جدًا، بظهر من الزجاج وإطار من المعدن. والموبايل حجمه مدمج، بوزن 190 جرام وسُمك 8.2 مللي، بالإضافة لمقاومة الماء والأتربة بمعايير IP68 وIP69، فالتجربة من الناحية دي ممتازة فعلًا، ولما تحط الموبايل على المكتب، بيكون ثابت بشكل واضح على ظهره من غير ما يترنح.
الشاشة: النقطة اللي هتحدد إذا كان الهاتف مناسب ليك
الشاشة هي أهم نقطة في الهاتف ده، وهي اللي هتحدد فعليًا لو الموبايل مناسب ليك أو لأ بسبب حجمها. الشاشة مقاس 6.31 بوصة من نوع LTPO AMOLED، بدقة 1.5K ومعدل تحديث 120 هيرتز، مع دعم HDR10+.
الشاشة مسطحة تمامًا، وحوافها جيدة، مش الأقل في الفئة لكن مقبولة جدًا، خصوصًا إن Honor 600 Pro حوافه أقل منها شوية. وبما إنها شاشة LTPO، فهي بتقدر تغير معدل التحديث من 1 هيرتز لـ120 هيرتز حسب الاستخدام، وده بيساعد كتير في توفير البطارية.
دي ميزة مش بنشوفها كتير في فئة الـFlagship Killer، لأن الشاشات اللي بتنخفض لمعدل 1 هيرتز غالبًا بتكون موجودة في الفلاج شيب بس. وفيفو هنا من الموبايلات القليلة جدًا في الفئة دي اللي بتقدم الميزة، جنب Samsung S25 FE. أما Honor 600 Pro وReno 16 Pro وXiaomi 17T Pro، فمعدل التحديث فيهم ماينزلش لـ1 هيرتز خالص.
ألوان الشاشة جيدة في وضع Standard، لكنها مش مشبعة بشكل كبير. ولو حولتها لوضع Bright، هتلاقي الألوان بقت أكتر تشبعًا وجمالًا، لكن اللون الأحمر بيبقى قوي زيادة شوية، فممكن تحتاج تظبط الألوان حسب ذوقك الشخصي.
السطوع المعلن بيتراوح بين 4500 و5000 شمعة، لكن فعليًا حوالي 2000 شمعة، وده رقم جيد جدًا. السطوع الفعلي هنا أعلى من Reno 16 Pro وأقل شوية من Honor 600 Pro. يعني مش أعلى سطوع في الفئة، لكنه بيأدي الغرض بشكل كويس جدًا. وكمان معدل PWM بيوصل لـ2160 هيرتز، وهو رقم جيد ومريح للعين في الاستخدام الطويل.
الأداء: Snapdragon 8 Gen 3 وتبريد أفضل من المتوقع
فيفو استخدمت هنا معالج كوالكم الرائد Snapdragon 8 Gen 3، مع ذاكرة تخزين سريعة UFS 4.1 ورام LPDDR5X. ويعمل الهاتف بواجهة OriginOS 6 المبنية على أندرويد 16، مع وعد بـ5 سنوات من تحديثات أندرويد، وهو رقم ممتاز جدًا في الفئة دي.
المعالج ده نسخة أقل بفرق بسيط جدًا من Snapdragon 8 Elite الموجود في Honor 600 Pro، وأقوى بفارق كبير من Dimensity 8550 Super الموجود في Reno 16 Pro، وأقل شوية كمان من Dimensity 9500 الموجود في Xiaomi 17T Pro.
وبالنسبة لتجربتي الشخصية، الأداء جه قريب جدًا من Honor 600 Pro بعيدًا عن الأرقام بس، مع ميزة إضافية مهمة في Vivo وهي عدد سنوات تحديثات أندرويد الأكبر، مقارنة بهونر اللي للأسف بتقدم سنتين بس في الشرق الأوسط.
النقطة اللي كنت قلقان منها هي السخونة، خصوصًا إن الموبايل صغير والمعالج قديم بجيلين، لكن الحقيقة إن نظام التبريد معقول جدًا. وفي اختبار الـThrottling، الهاتف قدم أداء أفضل من Honor 600 Pro وReno 16 Pro.
الموبايل بيقدر يتعامل مع الاستخدامات الثقيلة بشكل جيد جدًا، وده مش معناه إنه مش بيسخن، بالعكس بيسخن بشكل طبيعي، لكن في الحدود المقبولة، وصعب تلاحظ سخونة مزعجة في الاستخدام اليومي العادي، خصوصًا مقارنة بـReno 16 Pro اللي الحرارة فيه بتظهر أسرع بكتير.
الملاحظة الوحيدة اللي حابب أنبهك عليها إن لعبة PUBG حاليًا بتشتغل على 90 فريم بس. المعالج قادر طبعًا يشغلها على 120 فريم، لكن موبايلات فيفو دايمًا بتتأخر شوية في دعم معدلات الفريمات الأعلى في PUBG تحديدًا.
البطارية: شحن سريع يخلص في 50 دقيقة
بطارية بسعة 6500 مللي أمبير قادرة تستمر بأداء جيد لحد آخر اليوم، مع شاحن سريع بقدرة 90 واط بيشحن البطارية بالكامل في حوالي 50 دقيقة بس. وبيدعم الهاتف كمان الشحن اللاسلكي بقدرة 40 واط، والشحن اللاسلكي العكسي.
بس النقطة السلبية الوحيدة هنا إن منفذ الشحن من نوع Type-C 2.0، مش 3.1، يعني سرعة نقل البيانات مش أسرع حاجة في الفئة دي.
عوامل الأمان ومزايا إضافية
بصمة الإصبع موجودة أسفل الشاشة بأداء فائق السرعة، مع دعم فتح القفل بالتعرف على الوجه كمان كخيار إضافي.
الهاتف بيدعم خاصية NFC للدفع اللاتلامسي، ومستشعر IR Blaster للتحكم في الأجهزة الكهربائية من غير ريموت، ويدعم Haptic Feedback ممتاز جدًا مع مستشعر تقارب Ultra Sonic وشبكات ممتازة في الاستقبال بشكل عام.
السماعات الخارجية Stereo بأداء مقبول، مع دعم ميكروفون إضافي لعزل الضوضاء أثناء المكالمات أو التسجيل.
الكاميرات: نظام ثلاثي بتوقيع ZEISS
الهاتف بييجي بـ3 كاميرات خلفية:
- الكاميرا الرئيسية: 50 ميجابكسل بفتحة عدسة F/1.6، مثبت بصري، مستشعر سوني IMX921
- عدسة Telephoto: 50 ميجابكسل بفتحة عدسة F/2.7، مثبت بصري، مستشعر سوني IMX882
- عدسة Ultra Wide: 8 ميجابكسل بفتحة عدسة F/2.2
- كاميرا السيلفي: 50 ميجابكسل بفتحة عدسة F/2.0
الهاتف بيدعم تصوير بورتريه بأبعاد بؤرية تصل لـ100 مللي، مع ألوان حقيقية جدًا، وتصوير فيديو بدقة 8K عند 30 فريم، أو 4K عند 120 فريم، و4K عند 60 فريم بعدسة الزوم. أما عدسة Ultra Wide فبتدعم تصوير 1080p بس، والكاميرا الأمامية بتصور 4K عند 60 فريم.
جودة الصور بشكل عام ممتازة، والعدسة الرئيسية والـTelephoto بيقدموا نتائج قوية جدًا، لكن عدسة Ultra Wide فعليًا الأضعف في المجموعة، ولو عايز تشوف التجربة الفعلية للكاميرات بالتفصيل، تقدر تشوف فيديو المراجعة الكامل.
سعر Vivo X300 FE في مصر
الهاتف بييجي بنسخة واحدة بس حاليًا، وهي 256 جيجا تخزين + 12 جيجا رام، بسعر 49 ألف جنيه.
ويُقدم الهاتف بضمان محلي رسمي زيرو ضريبة، ويدعم تركيب شريحتين اتصال فعليتين، لكنه للأسف مايدعمش تركيب كارت ميموري خارجي، مع دعم شريحة eSIM كخيار إضافي.
الرأي النهائي: مميزات وعيوب Vivo X300 FE
مميزات Vivo X300 FE:
- شاشة صغيرة سهلة الاستخدام بيد واحدة
- خامات ممتازة وتصميم مختلف عن باقي الفئة
- بطارية جيدة جدًا مع شحن سريع خلال 50 دقيقة
- بصمة إصبع سريعة جدًا أسفل الشاشة
- كاميرات ممتازة خصوصًا الرئيسية والـTelephoto
- أداء قوي مع تبريد محترم أفضل من المنافسين
- 5 سنوات تحديثات أندرويد
عيوب Vivo X300 FE:
- منفذ Type-C 2.0 وليس 3.1
- كاميرا Ultra Wide متواضعة نسبيًا
- نسخة تخزين واحدة فقط 256 جيجا
- لعبة PUBG تعمل على 90 فريم فقط وقت الإطلاق الرسمي
بشكل عام، Vivo X300 FE هاتف قوي جدًا لمحبي الشاشات الصغيرة المدمجة اللي بيدوروا على أداء رائد حقيقي من غير ما يحملوا هاتف ضخم. المعالج قوي، التبريد ممتاز، والكاميرات تقدم نتائج تنافس فئة أعلى بكتير من السعر. لكن لو بتلعب PUBG بشراهة أو محتاج نسخة تخزين أكبر، يبقى الأفضل تاخد بالك من العيوب دي قبل ما تقرر.
أسئلة شائعة عن Vivo X300 FE
كم سعر Vivo X300 FE في مصر؟
يبدأ سعر النسخة الوحيدة المتاحة (256 جيجا تخزين + 12 جيجا رام) من 49 ألف
جنيه، بضمان محلي رسمي.
هل Vivo X300 FE يدعم كارت ميموري؟
لا، الهاتف لا يدعم تركيب كارت ميموري خارجي، لكنه يدعم تركيب شريحتين اتصال
فعليتين بالإضافة إلى eSIM.
كم عدد سنوات تحديثات أندرويد التي يحصل عليها الهاتف؟
يحصل الهاتف على وعد بخمس سنوات من تحديثات أندرويد، وهو رقم أعلى من منافسين
مثل Honor 600 Pro الذي يقدم سنتين فقط في الشرق الأوسط.
ما الفرق بين Vivo X300 FE وHonor 600 Pro؟
يقدم Honor 600 Pro معالج Snapdragon 8 Elite الأقوى بفارق بسيط، لكن Vivo X300
FE يتفوق في تبريد أفضل وعدد سنوات تحديثات أكبر.
